(ពោធិ៍សាត់)៖ ទំនាស់ ក៏ដូចជាបញ្ហាប្រឈម ដែលជាតម្រូវការក្នុងជីវភាពរស់នៅប្រចាំថ្ងៃ ប្រមាណជា១០ករណីផ្សេងគ្នា ត្រូវបានឯកឧត្តម ម៉ៅ ធនិន អភិបាលនៃគណៈអភិបាលខេត្តពោធិ៍សាត់ ធ្វើការដោះស្រាយបញ្ចប់ ជូនបងប្អូនពុកម៉ែប្រជាពលរដ្ឋ ទៅតាមលទ្ធភាពជាក់ស្តែង និងទៅតាមតួនាទីជាសមាជិកគ្រួសារប្រជាពលរដ្ឋទូទាំងខេត្ត ក្នុងវេទិកាដោះស្រាយក្តី ដែលធ្វើឡើងរវាងថ្នាក់ដឹកនាំខេត្ត ជាមួយនឹងប្រជាជន ចាប់ពីវេលាម៉ោង ៩ និង០០នាទីព្រឹក រហូតដល់ម៉ោង ១ និង៤៥នាទីរសៀល ថ្ងៃទី០៩ ខែកញ្ញា ឆ្នាំ២០២១នេះ។
កិច្ចដំណោះស្រាយខាងលើ ធ្វើឡើងក្រោយពីស្ថានភាពជំងឺកូវីដ១៩ បានធូរស្បើយបន្តិច ខណៈដែរខកខានមួយរយៈ ក្នុងអំឡុងនៃការរីករាលដាលជំងឺកូវីដ១៩ ដោយបានការអញ្ជើញចូលរួមពីឯកឧត្តម លោកជំទាវ សមាជិកក្រុមប្រឹក្សាខេត្ត, លោក លោកស្រី អភិបាលរងខេត្ត, លោក លោកស្រី ប្រធាន អនុប្រធានការិយាល័យប្រជាពលរដ្ឋ អភិបាលក្រុងស្រុក អាជ្ញាធរឃុំ និងភាគីពាក់ព័ន្ធផ្សេងទៀត។
បើតាមលោក គឹម ចន្ថា ប្រធានការិយាល័យប្រជាពលរដ្ឋខេត្តពោធិ៍សាត់ បានឱ្យដឹងថា នេះគឺជាទម្លាប់ ដែលឯកឧត្តមតែងតែជួបជាមួយពុកម៉ែប្រជាពលរដ្ឋ ដើម្បីចូលរួមចំណែកជាមួយសុខទុក្ខដោយផ្ទាល់ តាមរយៈវេទិកាដោះស្រាយសេចក្តី។ ដោយសារតែស្ថានភាពការរីករាលដាលជំងឺកូវីដ១៩ ឯកឧត្តមបានផ្អាកការធ្វើវេទិកាដោះស្រាយជាលក្ខណៈទ្រង់ទ្រាយធំមួយរយៈ ទើបតែស្ថានភាពនេះធូរស្បើយបន្តិច ឯកឧត្តមបានសម្រេចជ្រើសរើសសំណុំរឿង ដែលចាំបាច់បំផុត ក្នុងជីវភាពរស់នៅប្រចាំថ្ងៃ របស់បងប្អូនពុកម៉ែប្រជាពលរដ្ឋ ធ្វើការសម្របសម្រួល និងដោះស្រាយ។ ជាក់ស្តែងនាព្រឹកនេះ គឺមានចំនួន១០ករណី រួមមាន «ករណីលួចធ្វើប្លង់ដី, ករណីបោកលុយរត់ការប្លង់ដី, ករណីម្តាយក្មេងបណ្តេញចេញពីផ្ទះ, ករណីសុំទាមទារទ្រព្យសម្បត្តិ, ករណីសុំធ្វើប្លង់កាន់កាប់ដី, ករណីបែងចែកដី, ករណីទំនាស់ដីកេរត្តិ៍, ករណីហឹង្សាក្នុងគ្រួសារ, ករណីជំពាក់ប្រាក់ធនាគារ និងករណីបញ្ចាំមាស» ដែលកិច្ចការទាំងនេះ ត្រូវបានអនុវត្តន៍តាមវិធានការ «៣កុំ ៣ការពារ» របស់រាជរដ្ឋាភិបាល និងវិធានការនានារបស់ក្រសួងសុខាភិបាល។
លោកប្រធានការិយាល័យប្រជាពលរដ្ឋ បានបន្តថា យន្តការដែលឯកឧត្តមកំពុងតែដើរនេះ គឺជាយន្តការរបស់រាជរដ្ឋាភិបាល តាមរយៈវេទិកាសាធារណៈ ដែលបានចង្អុលបង្ហាញឱ្យថ្នាក់ក្រោមជាតិ ផ្សារភ្ជាប់សុខទុក្ខជាមួយប្រជាពលរដ្ឋដោយផ្ទាល់ ទៅលើបញ្ហាប្រឈម និងតម្រូវការចាំបាច់ក្នុងជីវភាពរស់នៅប្រចាំថ្ងៃ។
តាមរយៈវេទិកាសម្របសម្រួល និងដោះស្រាយខាងលើ បានធ្វើឱ្យប្រជាពលរដ្ឋមានការទទួលយក និងសាទរយ៉ាងខ្លាំង ចំពោះយន្តការដោះស្រាយដ៏មានប្រសិទ្ធភាព ជាពិសេសពួកគេបានគោរពថ្លែងអំណរគុណយ៉ាងអណេក ចំពោះសម្តេចតេជោ ហ៊ុន សែន នាយករដ្ឋមន្ត្រីនៃកម្ពុជា ដែលផ្តល់ជូនអភិបាលខេត្តដ៏ល្អយល់អំពីសុខទុក្ខរបស់ពលរដ្ឋ។ មួយវិញទៀតប្រជាពលរដ្ឋដែលមកទទួលដំណោះស្រាយ ខ្លះក៏ទទួលបានអង្ករ សារុង ក៏ដូចជាថវិកាបន្តិចបន្តួច សម្រាប់ជាទ្រនាប់ដៃ វិលត្រឡប់ទៅលំនៅដ្ឋានវិញផងដែរ៕
Ti Amo (ពស)
