(ពោធិ៍សាត់)៖ ឯកឧត្តម កែវ រតនៈ រដ្ឋមន្ត្រីប្រតិភូអមនាយករដ្ឋមន្ត្រី អគ្គនាយកអគ្គិសនីកម្ពុជា និងជាប្រធានក្រុមការងាររាជរដ្ឋាភិបាល ចុះជួយមូលដ្ឋានស្រុកក្រគរ និងស្រុកកណ្តៀង និងឯកឧត្តម ជាវ តាយ អភិបាលនៃគណៈអភិបាលខេត្តពោធិ៍សាត់ នាល្ងាចថ្ងៃទី១៥ ខែមករា ឆ្នាំ២០២២ បានអញ្ជើញជាអធិបតី ក្នុងពិធីបិទបញ្ចប់ការប្រកួត និងប្រគល់ពានរង្វាន់ជ័យលាភី ដល់ក្រុមកីឡាករ កីឡាការិនី បាល់ទាត់ និងបាល់ទះ ដែលចូលរួមប្រកួតដណ្តើមពានរង្វាន់ ៧ មករា លើកទី៩ ឆ្នាំ២០២២ ក្រោមការឧបត្ថម្ភពីសំណាក់ ឯកឧត្តម កែវ រតនៈ ស្រមតាមទិសស្លោក «កីឡានាំមកនូវ មិត្តភាព សាមគ្គីភាព និងសុខភាព» ដែលពិធីនេះធ្វើឡើងនៅបរិវេណអនុវិទ្យាល័យ ព្រះសីហនុក្រគរ ស្ថិតក្នុងភូមិឈើទាលខ្ពស់ ឃុំក្បាលត្រាច ស្រុកក្រគរ ខេត្តពោធិ៍សាត់។
ថ្លែងក្នុងឱកាសនោះ ឯកឧត្តម កែវ រតនៈ បានអបអរសាទរចំពោះជ័យលាភី ដល់ក្រុមជ័យលាភី ដែលបានខិតខំប្រឹងប្រែងប្រកួតប្រជែងលើប្រភេទកីឡានីមួយៗ អស់ពីសមត្ថភាព និងទេពកោសល្យរបស់ខ្លួន ដែលនេះជាការចូលរួមលើកស្ទួយវិស័យកីឡានៅក្នុងខេត្ត ពិសេសចំរាញ់យកគុណភាពកីឡាករ ទៅកាន់ថ្នាក់ជាតិ។
ឯកឧត្តមបន្តថា តាមរយៈការប្រកួតប្រជែង អស់រយៈពេល៣៦ថ្ងៃ ពោលគឺ(ចាប់ពីថ្ងៃទី១០ ខែធ្នូ ឆ្នាំ២០២១ រហូតដល់ថ្ងៃទី១៥ ខែមករា ឆ្នាំ២០២២) ពិតជាបានឈរលើស្មារតីទទួលខុសត្រូវខ្ពស់ ចេះគោរពវិន័យ បទបញ្ជា បច្ចេកទេស ស្រលាញ់ និងយោគយល់អធ្យាស្រ័យគ្នា ជាពិសេសបានឆ្លុះបញ្ចាំង នូវការចូលរួមលើកកម្ពស់វិស័យកីឡា ឱ្យមានការវិវឌ្ឍឈានទៅមុខជាលំដាប់។
ឯកឧត្តមបានគូសបញ្ជាក់ថា ទឹកចិត្ត និងស្មារតីជាអ្នកកីឡា គឺសំដៅថា ការចាញ់ឈ្នះគឺមិនសំខាន់ទេ ចំណុចដែលសំខាន់នោះឱ្យតែបានជួបជុំគ្នា រាប់អានគ្នា ស្រលាញ់គ្នា ជាក់ស្តែងដូចការប្រកួតនេះ គឺដើម្បីមិត្តភាព សាមគ្គីភាព សុខភាព និងឈាមទៅរួមគ្នា ដើម្បីកសាងស្រុកក្រគរឱ្យមានការរីកចម្រើន ហើយយើងសង្ឃឹមថានឹងបង្កើតឱ្យមានកម្មវិធីនេះបន្តទៅឆ្នាំក្រោយៗទៀត។ ឯកឧត្តម ក៏បានអំពាវនាវ ដល់ក្រុមកីឡាករ កីឡាការិនីទាំងអស់ ត្រូវបន្តអនុវត្តន៍វិធានការ «៣ការពារ ៣កុំ» ក៏ដូចជាវិធានការនានារបស់ក្រសួងសុខាភិបាល ឱ្យបានខ្ជាប់ខ្ជួន និងត្រូវផ្សព្វផ្សាយបន្តដល់ក្រុមគ្រួសារ និងប្រជាពលរដ្ឋ ឱ្យមកទទួលវ៉ាក់សាំងដូសជម្រុញតាមការជូនដំណឹងរបស់រដ្ឋបាលខេត្តឱ្យបានគ្រប់ៗគ្នា ដើម្បីការពារខ្លួនពី មេរោគកូវីដ១៩ បំប្លែងថ្មី ប្រភេទអូមេក្រុង។
សូមបញ្ជាក់ថា ឆ្នាំនេះគណៈកម្មការរៀបចំការប្រគួត បានទទួលចុះឈ្មោះក្រុមកីឡាករ កីឡាការិនី មានចំនួន២២ក្រុម កីឡាករសរុប ៤៨៥នាក់ ស្រី៦០នាក់ ដោយបែងចែក បាល់ទាត់បុរស១៧ក្រុម និងបាល់ទះនារី០៥ក្រុម។ ចំពោះលទ្ធផលប្រគួតរយៈពេល ៣៦ថ្ងៃមកនេះ គឺវិញ្ញាសាបាល់ទះ «នារី» ចំណាត់ថ្នាក់លេខ១ ក្រុមស្រលាញ់សន្តិភាព, ចំណាត់ថ្នាក់លេខ២ ក្រុម សសយក ស្រុកក្រគរ, ចំណាត់ថ្នាក់លេខ៣ ក្រុមវិទ្យាល័យសម្តេចតេជោ ហ៊ុន សែន ឈើតុំ និងចំណាត់ថ្នាក់លេខ៤ ក្រុមអនុវិទ្យាល័យព្រះសីហនុក្រគរ។ ដោយឡែកវិញ្ញាសាបាល់ទាត់ «បុរស ចំណាត់ថ្នាក់លេខ១ ក្លិបយុវជនឈើតុំCFC, ចំណាត់ថ្នាក់លេខ២ ក្លិបយុវជនTiger FC, ចំណាត់ថ្នាក់លេខ៣ ក្លិបយុវជនឃុំក្បាលត្រាច, ចំណាត់ថ្នាក់លេខ៤ ក្លិបយុវជនឃុំអន្សាចំបក់, ក្រុមបាល់ទាត់ដែលមានសីលធម៌ល្អ ក្រុមTiger FC, គ្រូបង្វឹកល្អជាងគេ ក្រុមឈើតុំCFC, កីឡាករទាត់បាល់បញ្ចូលទីច្រើនជាងគេ កីឡាករ ចាន់នី វុទ្ធី និងអ្នកចាំទីដែលល្អជាងគេ កីឡាករ ទ្រឿង វ៉ាឃីម៕
Ti Amo (ពស)
